Մինսկի խումբն այս պահին այլընտրանք չունի, այն սառեցվել է, ոչ թե վերացել․ Դավիթ Բաբայան

ԵԱՀԿ Մինսկի խումբը Լեռնային Ղարաբաղի հարցի լուծման միակ հարթակն է, և որպեսզի այլընտրանքներ լինեն, պետք է գոյություն ունենան բոլորի համար ընդունելի հարթակներ։ Sputnik Արմենիայի   հետ զրույցում նման կարծիք է հայտնել Արցախի արտգործնախարար Դավիթ Բաբայանը։

«Վաղաժամ է ասել` ինչպիսի զարգացումներ կլինեն, ինչ ճակատագիր կունենա Մինսկի խումբը, սակայն ինչքան տեսնում ենք` դեռևս այդ ձևաչափից չեն հրաժարվել։ Այո՛, նշվեց, որ Մինսկի խմբի գործունեությունը սառեցվում է, սակայն չեմ կարծում, որ արդեն իսկ ձևաչափը վերացել է կամ լուծարվում է, քանի որ գործընթացը պետք է այլ ընթացակարգով իրականանա, եթե նման ցանկություն առաջանա համանախագահ երկրների մոտ»,–ասել է Բաբայանը։

Ապրիլի 8-ին ՀՀ ԱԳ նախարար Արարատ Միրզոյանի հետ հանդիպման ժամանակ Ռուսաստանի ԱԳ նախարար Սերգեյ Լավրովը հայտարարել էր, որ ԵԱՀԿ Մինսկի խմբի անդամ ԱՄՆ-ն ու Ֆրանսիան հրաժարվում են ՌԴ–ի հետ արցախյան հարցով շփվելուց, հետևաբար, կարելի է ասել, որ Մինսկի խմբի ձևաչափը կարող է չեղարկվել։

Դավիթ Բաբայանը շեշտել է` որևէ մեկը չի հայտարարել, որ ԵԱՀԿ ՄԽ–ն լուծարվում է, և դա կարևոր գործոն է. պարզապես, հաշվի առնելով այն, որ Ռուսաստան-Արևմուտք հարաբերությունները գերլարված են, կառույցի գործունեությունն առժամանակ սառեցվում է։ Նա հավելել է՝ հույս ունեն, որ հարաբերությունները կկարգավորվեն և Մինսկի խումբը կսկսի գործել լիարժեք ձևաչափով, ուստի, դեռևս պետք է սպասել։

Նյութն ամբողջությամբ կարդացեք սկզբնաղբյուրում։