Մինսկի խումբն անդրադարձել է ԵԽԽՎ հակահայկական բանաձեւերին

ԵԱՀԿ Մինսկի խումբն անդրադարձել է ԵԽԽՎ-ի հակահայկական զեկույցներին: 

ԵԱՀԿ Մինսկի խմբի համանախագահները՝  Իգոր Պոպովը,  Ջեյմս Ուորլիքը եւ Պիեր Անդրյոն կոչ են արել չձեռնարկել քայլեր, որոնք կբարդացնեն Լեռնային Ղարաբաղի հակամարտության խաղաղ կարգավորման շուրջ բանակցային գործընթացը։ Այդ մասին ասված է համանախագահների տարածած հայտարարության մեջ:

« Մենք գնահատում ենք ԵԽԽՎ անդամների ցուցաբերած շահագրգռվածությունը, բայց կոչ ենք անում չձեռնարկել քայլեր, որոնք կարող են  թուլացնել Եվրոպայում անվտանգության և համագործակցության կազմակերպության կողմից Մինսկի խմբի ունեցած մանդատը կամ բարդացնել ընթացող բանակցությունները»,- ասված է հայտարարությունում:

Հիշեցնենք, որ ԵԽԽՎ ձմեռային նստաշրջանում  ընդգրկված է երկու հակահայկական զեկույց՝ բրիտանացի պատգամավոր Ռոբերտ Ուոլթերի  «Բռնությունների աճը Լեռնային Ղարաբաղում և Ադրբեջանի այլ օկուպացված տարածքներում»  եւ բոսնիացի պատգամավորի՝ Սարսանգի ջրամբարին առնչվող  «Ադրբեջանի սահմանամերձ շրջանների բնակչությունը միտումնավոր զրկված է ջրից» խորագրով զեկույցները:

Հակահայկական բանաձևերը քվեարկության կդրվեն հունվարի 26–ին: