Քաղաքապետի առաջին տեղակալը չկարողացավ ասել, թե ինչ հիմնավորմամբ են Չեխովի դպրոցում նոր ԺՊ նշանակել

Չեխովի անվան միջնակարգ դպրոցի աշակերտներն ու ծնողները բողոքի ակցիա էին կազմակերպել Երևանի քաղաքապետարանի մոտ՝ պահանջով, որ չեն ցանկանում իրենց դպրոցի տնօրեն նշանակվի մի մարդ, որին չեն ճանաչում: Նրանք քաղաքապետարան էին գնացել հաջակցություն դպրոցի նախկին տնօրենի պաշտոնակատար Տաթևիկ Մելքոնյանի, որը երկար տարիներ դպրոցում է աշխատել:

Քաղաքապետարանում ակցիայի մասնակիցներին դիմավորեց քաղաքապետի առաջին տեղակալ Լևոն Հովհաննիսյանը։ Նա պնդեց, որ աշակերտները պետք է հետ գնան դպրոց, անչափահաս են և չպետք է գային,սակայն աշակերտները պատասխանեցին, որ եկել են ծնողների հետ:

«Երեխաները պետք է վերադառնան դասի, երեխաների հետ ես բան չեմ խոսելու»,- նշեց տեղակալը և համաձայնեց իր մոտ քննարկման հրավիրել միայն ուսուցիչներին ու ծնողներին:

Իսկ լրագրողների հարցերին՝ ի՞նչ հիմնավորմամբ են Տաթևիկ Մելքոնայնին հանել ժամանակավոր պաշտոնակատարի պաշտոնից և նշանակել իրենց թեկնածու Դիանա Մինասյանին, Հովհաննիսյանն այդպես էլ չկարողացավ պատասխանել. «Նույն հիմնավորմամբ ենք հանել, որով նրան նշանակել էինք ժամանակավոր պաշտոնակատար»:

Ճշտող հարցին՝ ո՞րն է այդ հիմնավորումը, Լևոն Հովհաննիսյանը միայն պատասխանեց. «Դե լավ էլի»: