Դատական նիստն ընդմիջվեց․ Արմեն Գևորգյանը չի կարողացել ներկայանալ դատական նիստին

Երևան քաղաքի ընդհանուր իրավասության դատարանը, դատավոր Աննա Դանիբեկյանի նախագահությամբ, ընդմիջեց ենթադրյալ կաշառքի գործով քննությունը մինչև 16։00։

«Հայաստան» խմբակցության պատգամավոր Արմեն Գևորգյանը չի կարողացել ներկայանալ դատական նիստին, քանի որ հեռավար մասնակցում է մարտի 14-15-ին տեղի ունեցող՝ ԵԽԽՎ արտահերթ լիագումար նիստերի աշխատանքներին։ Պաշտպան Լուսինե Սահակյանը ներկայացրեց Արմեն Գևորգյանի դիմումը, որով կրկին հիշեցրել է դատարանին ԵԽԽՎ նիստերի մասին և խնդրել հետաձգել այսօրվա դատական նիստը։ Նիստերի միջև կա ընդամենը մեկ ժամ ընդմիջում, որի ընթացքում, ըստ Դանիբեկյանի, Արմեն Գևորգյանը պետք է հասցնի գալ դատարան։

ԵԽԽՎ նիստերի մասին Գևորգյանն ու իր պաշտպանը տեղեկացրել են դատարանին դեռևս մարտի 1-ին, ներկայացրել բոլոր պարզաբանումները և միջնորդել թույլ տալ Գևորգյանին՝ բացակայել ՀՀ տարածքից նիստին մասնակցելու նպատակով։ Սակայն դատարանը մերժել է միջնորդությունը։