Վաղն առավոտյան Վերաքննիչ դատարանում քննվելու է Առուշ Առուշանյանի խափանման միջոցի հարցը

Փետրվարի 8-ին, ժամը 10:30-ին Վերաքննիչ դատարանում` Գարեգին Նժդեհ 23 հասցեում, քննվելու է Գորիսի համայնքապետ Առուշ Առուշանյանի խափանման միջոցի հարցը։ 

ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, վաղը պատրաստվում է մասնակցել Գորիսի համայնքապետ Առուշ Առուշանյանի խափանման միջոցի վերաբերյալ վերաքննիչ քրեական դատարանի մոտ անցկացվելիք ակցիային։

«Վաղը՝ փետրվարի 8ին, ժամը 10:30 ես կլինեմ վերաքննիչ քրեական դատարանում, ի աջակցություն Գորիսի համայնքապետ, հայրենիքի պաշտպան ու ճիշտ հայ տղամարդ՝ Առուշ Առուշանյանի, ով ամիսներ շարունակ ապօրինաբար պահվում է կալանքի տակ:

Ձեր մասնակցությամբ հաստատեք, որ չե՛ք հանդուրժելու իշխանությունների այս խայտառակ բեսպրեդելը»,-գրել է նա:

ԱԺ «Հայաստան» խմբակցության պատգամավոր Գեղամ Նազարյանն էլ, կոչ անելով դատարանի մոտ հավաքվել, նշել է

«Առուշը մեր որդին ու եղբայրն է։ Առուշի դատն արժանապատվություն ունեցող բոլոր մարդկանց դատն է։ Հավաքվենք և դատավորին ու նրա տիրոջը հասկացնենք, թե մենք ով ենք»։

Հիշեցնենք, որ Գորիսի համայնքապետ Առուշ Առուշանյանը կալանավորված է 2021թ.–ի հուլիսի 16-ից: Իսկ հոկտեմբերի 17-ին Գորիսում կայացած ավագանու ընտրություններում ձայների մեծամասնությամբ հաղթեց կալանավորված, գործող համայնքապետ Առուշ Առուշանյանի գլխավորած «Առուշ Առուշանյան դաշինքը»։ Նոյեմբերին կայացած նորընտիր ավագանու նիստում Առուշ Առուշանյանն ընտրվել է համայնքի ղեկավար:

Առուշ Առուշանյանը չի ընդունում իր դեմ ներկայացրած մեղադրանքը, պաշտպանները պնդում են, որ մեղադրանքի հիմքում որևէ փաստական ապացույց չկա, քրեական գործը շինծու է: