2018-ին առաջնահերթ լուծում պահանջող խնդիրների համար Շիրակի և Լոռու մարզերին հատկացվել է 774 միլիոն 425 հազար դրամ. Պապիկյան

Այսօր կառավարության` Գյումրիում տեղի ունեցած արտահերթ արտագնա նիստում տարածքային կառավարման ու զարգացման նախարարի պաշտոնակատար Սուրեն Պապիկյանը ներկայացրեց աղետի գոտում 2018 թվականի ընթացքում կատարված և 2019 թվականի ընթացքում կատարվելիք աշխատանքների վերաբերյալ զեկույցը։

Նա նշեց, որ 2018-ին առաջնահերթ լուծում պահանջող խնդիրների համար Շիրակի և Լոռու մարզերին հատկացվել է 774 միլիոն 425 հազար դրամ։ «Շիրակին հատկացվել է 354 միլիոն 915 հազար, իսկ Լոռուն՝ 419 միլիոն 510 հազար դրամ», - նշեց Սուրեն Պապիկյանը։

Նրա խոսքով` գումարը հատկացվել է շուրջ 45 բնակավայրում 54 ծրագիր իրականացնելու համար: Նույն ծրագրի շրջանակներում ՀՀ Շիրակի և Լոռու մարզերի համայնքներին հատկացվել է 42 միլիոն 973 հազար դրամ։

Պապիկյանի խոսքով՝ 2018 թվականի ընթացքում հանձնաժողովի կողմից ՀՀ Շիրակի և Լոռու մարզերում հավանության են արժանացել 33 սուբվենցիոն ծրագրեր՝ 1 մլրդ 599 մլն 282 հազար դրամ ընդհանուր բյուջեով: «27 ծրագրերի մրցույթի արդյունքում ծրագրերի գումարը կազմել է 903 մլն 809 հազար դրամ, որից պետական բյուջեի ֆինանսավորման չափը՝ 381 մլն 274  հազար դրամ»,- ասաց նա։

Նախարարի պաշտոնակատարը նշեց, որ Շիրակի և Լոռու մարզերում 4 ճանապարհների վերանորոգման նպատակով ՀՀ տրանսպորտի, կապի և տեղեկատվական տեխնոլոգիաների նախարարությանը հատկացվել է 222 մլն 654 հազար դրամ: Աշխատանքները կշարունակվեն նաև 2019 թվականին:

«Հայաստանի տարածքային զարգացման հիմնադրամի միջոցով ՀՀ Լոռու և Շիրակի մարզերում իրականացվում է 7 ծրագիր, որոնցից 2-ի ավարտը նախատեսված է 2019 թվականին: Ծրագրերի ընդհանուր արժեքը կազմում է 1 միլիարդ 939 միլիոն 574 հազար դրամ»,- նշեց նա:

Պապիկյանի խոսքով՝ Վերակառուցման և զարգացման եվրոպական բանկի աջակցությամբ իրականացվող` «Գյումրու քաղաքային ճանապարհներ» տեխնիկական համագործակցության դրամաշնորհային ծրագրի շրջանակներում հատկացվել է շուրջ 1 մլրդ 82 մլն 100  հազար դրամ:

«USAID-ի կողմից ՀՀ Շիրակի մարզի Ամասիա, Արփի, Սարապատ և Աշոցք համայնքների համար ճանապարհաշինական տեխնիկա, ինքնագնաց գյուղտեխնիկա և կցովի գյուղգործիքներ ձեռք բերելու նպատակով հատկացվել է 1 մլն 486 հազար դոլար»,- նշեց նա։

Սուրեն Պապիկանը հայտնեց, որ ԵՄ-ի հետ համագործակցության արդյունքում ՀՀ Շիրակի և Լոռու մարզերում իրականացվում են տարածաշրջանային զարգացման պիլոտային ծրագրեր։