Սպիտակի վաղվա օրը կերտելու ենք միասնաբար. համայնքի ղեկավարի դաշնակցական թեկնածու

ՀՅԴ Լոռու Մարզային կոմիտեի անդամ Սասուն Ասատրյանը տեղեկացնում է, որ 2021 թ․ դեկտեմբերի 5-ին կայանալիք՝ Սպիտակ խոշորացված համայնքի ավագանու ընտրություններում գլխավորելու է ՀՅԴ ցուցակը։ Ստորև ներկայացնում ենք թեկնածուի հայտարարությունը։

Սիրելի՛ սպիտակցիներ և հարակից գյուղերի հայրենակիցներ

Ցանկանում եմ տեղեկացնել, որ ես՝ Սասուն Նորիկի Ասատրյանս, 2021 թ. դեկտեմբերի 5-ին անցկացվելիք՝ Սպիտակ խոշորացված համայնքի ավագանու ընտրություններում գլխավորելու եմ Հայ Յեղափոխական Դաշնակցության ցուցակը։

Մեր համայնքի վաղվա օրը որոշողը դուք եք, և ձեր ճիշտ ընտրությունից կախված կլինի բոլորիս սիրելի Սպիտակ քաղաքի և շրջանի գյուղերի ապագան, նրանց զարգացման ընթացքը։

Մեր թիմում ընդգրկված թեկնածուների անցած ուղին, փորձառությունն ու կենսագրությունը, բարոյական նկարագիրը և սեփական քաղաքի ու գյուղի հանդեպ ունեցած մեծ սերն ու նվիրումը լավագույնս փաստում են, որ դեկտեմբերի 5-ը մեր խոշորացված համայնքի համար հանդիսանալու է նոր ծրագրերի ու գաղափարների իրականացման մեկնարկի օր: Ամենակարևորը՝ յուրաքանչյուր ծրագիր, միտք ու գաղափար իրականացվելու է հանդուրժողականության, փոխադարձ հարգանքի ու սիրո մթնոլորտում. մենք կարճ ժամանակում վերականգնելու ենք ներհամայնքային համերաշխությունը, որը վերջին շրջանում խլվել է մեզանից:

Մենք պատրաստ ենք պետության առաջին անկյունաքարի՝ համայնքի վաղվա օրը կերտել միասնաբար՝ ՀՅԴ աշխարհասփյուռ կառույցի օժանդակությամբ։