ՀՅԴ-ն ունի հիմնահարցերի լուծման կոնկրետ ծրագրեր. Սևան համայնքի ղեկավարի դաշնակցական թեկնածու

ՀՅԴ Գեղարքունիքի Մարզային կոմիտեի նախագահ Արտակ Վարդանյանը տեղեկացնում է, որ 2021 թ. դեկտեմբերի 5-ին անցկացվելիք՝ Սևան խոշորացված համայնքի ավագանու ընտրություններում գլխավորելու է Հայ Յեղափոխական Դաշնակցության ցուցակը։ Ստորև ներկայացնում ենք ՀՅԴ Սևանի կոմիտեության պաշտոնական էջի՝ այդ առթիվ տարածած հայտարարությունը.

Սեւան խոշորացված համայնքի սիրելի բնակիչներ

Ցանկանում եմ ձեզ տեղեկացնել, որ ես` ԱՐՏԱԿ ՎԱԼԵՐԻԱՅԻ ՎԱՐԴԱՆՅԱՆՍ, 2021թ. դեկտեմբերի 5-ին կայանալիք Սեւան խոշորացված համայնքի ավագանու ընտրություններում պատիվ ունեմ գլխավորելու Հայ Յեղափոխական Դաշնակցություն կուսակցության ցուցակը:

Հայ Յեղափոխական Դաշնակցությունը նկատի ունենալով Սեւան քաղաքի եւ տարածքի 10 գյուղերի բարդ խնդիրների հաղթահարման, համայնքի զարգացման, արդյունավետ կառավարման մարտահրավերները, պատրաստակամություն է հայտնել մասնակցել գալիք ընտրություններին` հավակնելով մեծամասնություն ունենալ համայնքի ավագանու կազմում եւ ստանձնել տարածքի կառավարման կարեւոր գործը:

Ներգրավվելով քաղաքական պայքարի մեջ` Հայ Յեղափոխական Դաշնակցություն կուսակցությունը ուսումնասիրել է համայնքի` նրա կազմի մեջ մտնող գյուղերի, քաղաքի խնդիրներն ու հիմնահարցերը եւ ունի դրանց լուծման կոնկրետ ծրագրեր եւ մոտեցումներ, որոնք ավելի մանրամասնորեն ներառված են մեր նախընտրական ծրագրում, որն առաջիկայում կներկայացվի ձեր քննությանը:

Հավակնելով Սեւան համայնքի ավագանու կազմում ունենալ մեծամասնություն` Հայ Յեղափոխական Դաշնակցություն կուսակցությունը Հայաստանի ԱԺ-ում իր ներկայացվածությամբ` պատրաստ է Հայաստանում եւ սփյուռքում ունեցած իր հզոր պոտենցիալը ներդնել համայնքում առկա խնդիրների լուծմանը, զարկ տալ տարածքի տնտեսական կյանքի աշխուժացմանը բոլոր բնագավառներում` նպատակ ունենալով ներդրումների միջոցով լուծել մեզ համար այնքան ցավոտ դարձած հարցերը` արտագաղթը, գործազրկությունը, աղքատությունը: Մենք հասկանում ենք, որ սրանք այսրոպեական լուծվելիք խնդիրներ չեն: Սակայն ակնկալելով ստանալ ձեր վստահության քվեն` ունակ ենք համատեղ ուժերով, ձեր ակտիվ մասնակցությամբ` կուսակցության ներուժի միջոցով հող նախապատրաստելու դրանց աստիճանական լուծման համար:

Արտակ Վարդանյան