Տեղի կունենա Moscow Classic Ensemble-ի աշնանային համերգը. Արցախի ստեղծագործական դպրոցներին կհանձնվեն երաժշտական գործիքներ

Հոկտեմբերի 28-ին՝ ժամը 19:00-ին, Արամ Խաչատրյանի տուն-թանգարանում տեղի կունենա Moscow Classic Ensemble-ի աշնանային համերգը: Ավարտին կկայանա երաժշտական գործիքների հանդիսավոր հանձնումը` նվիրելու են Արցախի ստեղծագործական դպրոցներին:

Նախաձեռնությունը մեկնարկել է դեռևս այս տարվա օգոստոսի 13-ին,Գառնիի տաճարի մոտ տեղի ունեցած Moscow Classic Ensemble-ի «Երեխաները ուզում են նվագել» բարեգործական երեկոյի ընթացքում:

Այդ դպրոցների համար ձեռք են բերվել բոլոր անհրաժեշտ երաժշտական գործիքները: 

«Երեխաները ուզում են նվագել» բարեգործական երեկոն բազմաթիվ արձագանքներ է ստացել երեխաների աջակցությամբ զբաղվող կազմակերպություններից: Որոշվել է այս անգամ ևս կազմակերպել երեխաների ստեղծագործությունների ցուցահանդես, այն երեխաների, որոնց ընտանիքները տուժել են պատերազմական գործողությունների ընթացքում:

Աշնանային համերգի շրջանակներում կազմակերպված ցուցահանդեսի բոլոր աշխատանքերը կվաճառվեն տաղանդավոր երեխաներին ու նրանց ընտանիքներին օգնելու նպատակով: Համերգի մուտքն անվճար է:

Moscow Classic Ensemble-ի աշնանային բարեգործական համերգի շրջանակներում տեղի կունենա հայտնի ռուս երաժիշտ և ՌԴ վաստակավոր արտիստ Ստանիսլավ Ալեքսանդրովիչ Կատենինի վարպետության դասը, որին կմասնակցեն Երևանի պետական կոնսերվատորիայի սաները:

Moscow Classic Ensemble ուրախ է իր ներդրումն ունենալ երկու երկրների ստեղծագործական երկխոսության գործում: