Էրդողանը խոստովանել է, որ չի հաջողվել «լավ սկսել աշխատել» Բայդենի հետ

Թուրքիայի նախագահ Ռեջեփ Թայիփ Էրդողանը խոստովանել է, որ ԱՄՆ նախագահ Ջո Բայդենի հետ իր համագործակցությունն ի սկզբանե սխալ է եղել: Այդ մասին նա հինգշաբթի հայտնել է թուրք լրագրողներին օդանավում՝ ԱՄՆ-ից վերադառնալիս. հայտնում է ՏԱՍՍ-ը՝ վկայակոչելով թուրքական լրատվամիջոցներին:

«Ես լավ աշխատեցի Բուշ կրտսերի, պարոն Օբամայի, պարոն Թրամփի հետ, բայց չեմ կարող ասել, որ մենք լավ սկսեցինք պարոն Բայդենի հետ: Բայդենը սկսել է զենք, զինամթերք և սարքավորումներ մատակարարել Սիրիայի ահաբեկչական կազմավորումներին (Սիրիայի քրդերին՝ խմբ.): Մենք չենք պատրաստվում դրան անտարբերությամբ նայել»,- ասել է Էրդողանը:

Նա նաև կարծիք է հայտնել, որ ԱՄՆ-ը ստիպված կլինի « թանկ վճարել» Աֆղանստանում մնացած ամերիկյան զենքի համար, որն այժմ գտնվում է «Թալիբան» շարժման արմատականների մոտ: «Եթե նայեք ներկայումս «Թալիբան» շարժման զենքերին, կհասկանաք, որ դրանք ամերիկյան են: Հետևաբար, դրա համար ստիպված կլինեն գին վճարել»,- հավելել է Էրդողանը: