Էրդողանը կկորցնի իշխանությունն առաջիկա ընտրություններում. թուրքական ընդդիմության առաջնորդ

Թուրքիայի գլխավոր ընդդիմադիր, քեմալական Հանրապետական-ժողովրդական կուսակցության (CHP) առաջնորդ Քեմալ Քըլըչդարօղլուն հայտարարել է, որ Էրդողանը գալիք ընտրություններում կկորցնի իշխանությունը:

Քըլըչդարօղլուն ասել է, որ հնարավոր է ընտրություններից առաջ թուրքական իշխանությունները նախաձեռնեն ընտրական օրենսդրության փոփոխություններ, որոնք թույլ չեն տա դաշինքների մուտքը խորհրդարան:

«Էրդողանը սկսել է խաղալ ընտրական օրենքների հետ՝ իր իշխանությունը պահպանելու համար: Բայց ճշմարտությունը, որը պատմությունը ցույց է տալիս, հետևյալն է՝ կառավարությունը, որը սկսում է խաղալ ընտրական օրենսդրության հետ, ժամանակավոր բնույթ է կրում»,- ասել է Քըլըչդարօղլուն:

Նա նշել է, որ Էրդողանը չի կարող ճիշտ առաջնահերթություններ սահմանել, նա փակվել է պալատում՝ կտրված թուրքական իրականությունից, այժմ միայն մտածում է, թե ինչպես պահել իր գոյությունն այդ պալատում:

«Անկախ օրենքներում փոփոխություններից՝ Էրդողանը կհեռանա: Հասարակությունն այլևս նրան չի ցանկանում: Առաջին ընտրությունների ժամանակ իշխանափոխություն կլինի»,- ասել է ընդդիմության առաջնորդը: