Բլինքենը հանդիպել է Բելառուսի ընդդիմության առաջնորդ Տիխանովսկայայի հետ. ԱՄՆ պետդեպարտամենտ

ԱՄՆ պետքարտուղար Էնթոնի Բլինքենը երկուշաբթի բանակցություններ է վարել նախագահի նախկին թեկնածու, բելառուսական ընդդիմության առաջնորդ Սվետլանա Տիխանովսկայայի հետ, ինչը բխում է Պետդեպարտամենտի հրապարակած ժամանակացույցից:

Ըստ ժամանակացույցի՝ հանդիպումը տեղի է ունեցել տեղական ժամանակով ժամը 12:10-ին  Պետդեպարտամենտի շենքում:

Բլինքենի հետ հանդիպմանը մասնակցել է ԱՄՆ պետքարտուղարի տեղակալ Վիկտորյա Նուլանդը:

Ավելի վաղ Տիխանովսկայան Twitter-ում գրել էր, որ մտադիր է հանդիպել Բլինքենի և Նուլանդի հետ, որպեսզի «քննարկեն բելառուսներին և բռնաճնշումների ենթարկված քաղաքացիական հասարակությանը արդյունավետ օգնությունը, ինչպես նաև Բելառուսի վարչակարգի դեմ նոր պատժամիջոցները»:

Տիխանովսկայան ԱՄՆ է ժամանել կիրակի օրը: Նա նշել է, որ ուղևորության ընթացքում նախատեսում է այցելել Վաշինգտոն, Նյու Յորք և Կալիֆոռնիա, ինչպես նաև հանդիպումներ ունենալ քաղաքական գործիչների, փորձագետների և բելառուսական սփյուռքի հետ: