Թուրքիան Աֆղանստան կուղարկի 2000 սիրիացի գրոհայինների

Թուրքիան պատրաստվում է 2000 պատրաստված սիրիացի զինյալների ուղարկել Աֆղանստան: Այս մասին հայտնում է «Կրասնայա վեսնա» լրատվական գործակալությունը՝ վկայակոչելով Սիրիայում իր աղբյուրները:

«Թուրքիան պատրաստվում է «Ֆիրկաթ աս Սուլթան Սուլեյման շահ» խմբավորման  2000 ահաբեկիչների Աֆրինից Աֆղանստան ուղարկել»,- նշել է լրատվամիջոցը:

Ի՞նչ առաքելություն են նրանք իրականացնելու Աֆղանստանի տարածքում՝ անհայտ է: Անկարան առաջին անգամ չէ, որ կիրառում է օտարերկրյա մարտիկների: Այս ռազմավարությունն արդեն կիրառվել է Լիբիայում և Լեռնային Ղարաբաղում: Մարդու իրավունքների սիրիական մոնիտորինգային կենտրոնը (SOHR) տեղեկություններ ունի, որ Սիրիայից մի քանի հազար ահաբեկիչներ, որոնք այնտեղ են ուղարկվել Թուրքիայի կողմից, դեռ գտնվում են Լիբիայում:

Աֆղանստանում իրավիճակը սրվեց երկրից ամերիկյան զորքերի դուրսբերումից հետո: Թալիբները արագորեն սկսել են վերահսկել երկիրը: Ավելի վաղ նրանք արդեն հասել էին Տաջիկստանի սահմաններ և գրավել կամուրջ: