Քոչարյանը չի վերադառնում նույն ձևով, ինչ եղել է այն ժամանակ, փոխվել է․ Արմեն Ռուստամյան

«Դաշնակցություն» կուսակցության բյուրոյի նախագահ, «Հայաստան» դաշինքի նախընտրական ցուցակի 7-րդ հորիզոնականը զբաղեցնող Արմեն Ռուստամյանը գտնում է, որ նախկին նախագահ Ռոբերտ Քոչարյանը փոխվել է։

Ասում է՝ իմաստնացել է։ ՀՅԴ-ական գործիչը համաձայն չէ այն քննադատություններին, որ Քոչարյանն իր նախագահության տարիներին իր համախոհներով ապօրինի կերպով մեծ հարստություն է կուտակել և հակադարձում է՝ եթե այդպես է, թող հայտնաբերեն ու պատասխանատվության ենթարկեն։

Անդրադառնալով 44-օրյա պատերազմին և ՌԴ-ի կողմից զենքի գնման մատակարարումն ուշացնելու վերաբերյալ դիտարկումներին՝ ասում է, տվյալներ կան, որ գնված զենքը թողնվել է Կովկասի հյուսիսում և մինչև պատերազմը չի ներկրվել։

Ինչ վերաբերում է երեկ Էրդողանի և Ալիևի՝ Շուշի կատարած այցին, Արմեն Ռուստամյանն ասաց, որ այդ քաղաքը մեզ համար դառնալու է նույնը, ինչ Մասիս սարն է։

«Շուշին մերն է, բայց թուրքերի ձեռքում է։ Շուշին բարձունքի վրա ճոխացնելու են, դարձնելու են ծաղկող մի տարածք, և մենք անընդհատ դրա կողքով անցնելու ենք ու ողբալու ենք, թե ինչպես կորցրեցինք մեր քաղաքը»,- հավելեց նա։

Մանրամասները՝ տեսանյութում։