Երկրում առավել կարեւոր խնդիրներ կան, քան իշխանության ներկայացրած օրինագծերը. Զոհրաբյան

Երկրում առավել կարեւոր խնդիրներ կան, քան իշխանության ներկայացրած օրինագծերը, օրինակ՝ «Ավտոմոբիլային տրանսպորտի մասին» օրենքը, որը կառավարությունն անհասկանալի պատճառներով օպերատիվ կարգով որոշել է քննարկման դնել: Այս մասին ԱԺ արտահերթ նիստում հայտարարեց ընդդիմադիր պատգամավոր Նաիրա Զոհրաբյանը:

Նա, մասնավորապես, նշեց. «Ժամանակն է դուրս գալ վիրտուալ իրականությունից եւ վերադառնալ օբյեկտիվ իրականություն: Մենք պետք է քննարկենք, թե ինչպես ստացվեց, որ մեր հերոսների մնացորդները տոպրակների մեջ նետեցին հատակին՝ կարտոֆիլի մեշոկների նման»:

Պատգամավորը նշեց, որ եղել է Աբովյանի դիահերձարանում եւ տեսել այդ սարսափելի տեսարանը: Զոհրաբյանի համար անհասկանալի է՝ ինչպես է ստացվել, որ նման անփութության համար պատասխանատվության են ենթարկվել միայն սանիտարն ու դիահերձարանի բաժնի վարիչը՝ այն դեպքում, երբ նրանք ընդհանրապես մեղավոր չեն:

«Այդ դիահերձարանում կա 10 տեղ մարմինների եւ մնացորդների պահման համար: Մեզ ասում են, որ մնացորդների թվում կարող են լինել ադրբեջանցի զինվորների մնացորդներ: Միգուցե հանկարծ պարզվի, որ ծնողներին փոխանցել են ադրբեջանցիների մարմիննե՞ր»,- հետաքրքրվեց պատգամավորը: