ԱՄՆ-ի բարեկամությունը սուտ է, իսկ ռազմավարական գործընկերությունը՝ հեքիաթ. «գորշ գայլեր»–ի առաջնորդ

ԱՄՆ նախագահ Ջո Բայդենը լուրջ հարված է հասցրել Թուրքիայի հետ դաշնակցային հարաբերություններին. հայտարարել է Թուրքիայի ընդդիմադիր «Ազգայնական շարժում» կուսակցության (MHP) առաջնորդ Դևլեթ Բահչելին՝ մեկնաբանելով Սպիտակ տան ղեկավարի՝ Օսմանյան կայսրությունում 1914-23 թվականին տեղի ունեցած Հայոց ցեղասպանության վերաբերյալ  հայտարարությունները, որոնք մեծ արձագանք են առաջացրել Թուրքիայում։

Ըստ նրա՝ «այսպես կոչված, ցեղասպանության մասին հայտարարությունն ապացուցել է, որ ԱՄՆ-ի բարեկամությունը սուտ է, իսկ ռազմավարական գործընկերությունը՝ հեքիաթ»:

Բահչելին նշել է, որ Թուրքիայի և ԱՄՆ-ի հարաբերությունները պատմական ճամփաբաժանին են։

«Անկարան պետք է նախ տեղակայի Ս-400 համալիրները և ԱՄՆ-ից պահանջի վերադարձնել Ֆ-35 հինգերորդ սերնդի ինքնաթիռների ծրագրի շրջանակներում փոխանցված միջոցները»,- ասել է նա:

Քաղաքական գործիչը Բայդենին որակել է «խաղալիք (հայկական) լոբբիի ձեռքին»:

«ԱՄՆ նախագահը հայկական սփյուռքի ազդեցության տակ է: 2021 թ. ապրիլի 24-ի օրը դարձավ սև կետ պատմության մեջ, ականապատեց երկրների միջև երկխոսության կամուրջները»,- հավելել է Բահչելին: