Չավուշօղլուն հայտարարել է Եգիպտոսի հետ հարաբերությունների նոր շրջանի սկզբի մասին

Թուրքիայի արտգործնախարար Մևլյութ Չավուշօղլուն հայտարարել է, որ Կահիրեի հետ Անկարայի հարաբերություններում սկսվում է նոր ժամանակաշրջան, իսկ երկու երկրների բարձրաստիճան պաշտոնյաները մտադիր են բանակցություններ վարել:

Անցյալ ամիս Թուրքիան հայտարարել էր, որ վերսկսել են Եգիպտոսի հետ դիվանագիտական շփումները, և տարիներ տևած լարվածությունից հետո ցանկանում է հետագա համագործակցություն. հայտնում է GazeteDuvar–ը։

Պարբերականը նշում է, որ տարածաշրջանային տերությունների հարաբերությունների ջերմացումը կարող է հետևանքներ ունենալ ամբողջ Միջերկրական ծովի վրա: «Նրանք աջակցում էին Լիբիայի պատերազմի մրցակից կողմերին և ծովափնյա այլ պետությունների հետ հակառակ ծովային գործարքներ կնքում»,- հիշեցնում է կայքը:

«Նոր ժամանակաշրջան է սկսվում»,- ասել է Չավուշօղլուն Եգիպտոսի հետ կապերի մասին:

Բացի այդ՝, արտգործնախարարը պատասխանել է դեսպանների՝ հնարավոր նշանակումների մասին հարցին: «Մենք դեռ չենք քննարկել սա: Տեղի կունենա հանդիպում փոխնախարարների և դիվանագետների մակարդակով: Հարցը կլինի օրակարգում: Ամսաթիվը դեռ պարզ չէ: Դրանից հետո մենք կհանդիպենք: Մանրամասները կքննարկվեն այնտեղ», - ասել է նա:

Կայքը հիշեցնում է, որ Չավուշօղլուն և նրա եգիպտացի պաշտոնակիցը ապրիլի 10-ին հեռախոսազրույց են ունեցել և բարեմաղթանքներ փոխանակել իսլամական սուրբ Ռամադան ամսվա կապակցությամբ, ինչը նրանց առաջին անմիջական շփումն է դիվանագիտական ճգնաժամի սկզբից ի վեր:

Կահիրեն հայտարարել է, որ հարաբերությունների կարգավորման համար Թուրքիայի գործողությունները «պետք է ցույց տան եգիպտական սկզբունքներին համապատասխանությունը»: Անցյալ ամիս Անկարան Թուրքիայում գործող եգիպտական ընդդիմադիր հեռուստաընկերություններին խնդրել էր չափավոր քննադատել Կահիրեին՝ որպես լարվածությունը թուլացնելու առաջին կոնկրետ քայլ. ասվում է հոդվածում: