Իսրայելին մտահոգում է Չինաստանի ու Իրանի միջև հետախուզական տվյալների փոխանակումը

Իսրայելի ռազմական հետախուզության նախկին պետ Ամոս Յադլինը երեկ մտահոգություն է հայտնել Չինաստանի և Իրանի միջև հետախուզական տվյալների հնարավոր փոխանակման կապակցությամբ, որը հնարավոր է դարձնում երկու երկրների միջեւ ստորագրված վերջին ռազմավարական համաձայնագիրը:

«Իրանի և Չինաստանի միջև համաձայնագրի ամենաանհանգստացնող կետերից մեկը հետախուզական տվյալների փոխանակումն է»,- ասել է Յադլինը, որն այժմ ղեկավարում է Ազգային անվտանգության ուսումնասիրությունների ինստիտուտը:

Նա շեշտել է, որ թեև համաձայնագրի մանրամասները դեռ չեն հրապարակվել, համաձայնագրի նախորդ նախագիծը ասում էր, որ երկու երկրները համատեղ դասընթացներ և վարժանքներ են անցկացնում:

Հին նախագիծը նաև ասում էր, որ երկրները համագործակցելու են զենքի հետազոտման և մշակման, ինչպես նաև հետախուզական տվյալների փոխանակման հարցում:

«Չինաստանը իրեն դնում է այնպիսի իրավիճակում, որում մինչ այժմ չի եղել»,- ասել է Յադլինը:

Միևնույն ժամանակ, նա նշել է. «Չինացիները հասկանում են, որ Բայդենի վարչակազմը Թրամփի վարչակազմը չէ, և նրանք կարող են շատ ավելի ագրեսիվ լինել»: