Աբորիգեն պատգամավորին վռնդել են խորհրդարանից փողկապ չկրելու պատճառով

Նոր Զելանդիայում պատգամավոր Ռավիրի Ուայտիտին, որը խորհրդարանում ներկայացնում է մաորի աբորիգեն ժողովրդին, վռնդվել է նիստից փողկապ չկապելու պատճառով: Տղամարդը փոխարենը կրել է ավանդական «հեյ-տիկի» զարդերը. գրում է New Zealand Herald-ը:

Հանդիպման ընթացքում Ուայտիտին փորձել է հարց ուղղել խոսնակ Թրևոր Մալարդին, բայց նա պատասխանել է, որ հարցեր տալու իրավունք ունեն միայն փողկապ ունեցող խորհրդարանականները: Պատգամավորի՝ ելույթ ունենալու մի քանի փորձերից, ինչպես նաև բանախոսի հետ կատաղի վեճից հետո նրան դուրս են հրավիրել նիստերի դահլիճից:

Մաորի պատգամավորի կարծիքով՝ դա արվել է եվրոպական ոճին հետևել չցանկանալու պատճառով: Բացի այդ՝ նա փողկապն անվանել է «գաղութային սեղմօղակ»: «Ես երբեք չեմ հրաժարվի իմ մշակույթից»,- ասել է Ուայտիտին՝ հավելելով,  որ Մալարդի որոշումը խախտում է բնիկ ժողովուրդների իրավունքները: