Բրիտանական խորհրդարանից համակարգիչներ են գողանում

Մեծ Բրիտանիայի խորհրդարանից ամեն ամիս միջինը երկու համակարգիչ է գողացվում. այսօր հայտարարել են բրիտանական իշխանությունները: Փաստորեն, նրանք խոստովանում են, որ գողերին հաջողվում է մուտք գործել երկրի ամենալավ պաշտպանվող շենքերից մեկը:

ИТАР-ТАСС-ը, վկայակոչելով բրիտանական ԶԼՄ-ներ, հայտնում է, որ այս տարի խորհրդարանի շենքից արդեն 25 համակարգիչ եւ 6 բջջային հեռախոս է գողացվել:

Համայնքների պալատի կանոնակարգային հանձնաժողովի անդամ, լիբերալ-դեմոկրատ պատգամավոր Ջոն Թերսոն հայտարարել է. «Խորհրդարանի գործերի կառավարչությունը եւ լոնդոնյան ոստիկանությունը համատեղ սկսել են հանցագործությունների կանխման ծրագրի իրականացումը: Պատգամավորներին եւ խորհրդարանի աշխատակազմի աշխատակիցներին խորհուրդ է տրվել աշխատանքային օրվա վերջում կողպել գրասենյակների դռները: Գիշերները շենքում պարեկություն է իրականացվելու»: