Նույնիսկ ՀՀ–ն չի ճանաչել Արցախը. կարգավիճակի մասին խոսելը դեռ վաղ է. Մեդվեդև

Լեռնային Ղարաբաղի կարգավիճակի հարցը ներկայումս հնարավոր չէ քննարկել, այս թեմայի շուրջ քննարկումների դաշտի ցանկացած էլեկտրականացում հանգեցնում է հզոր լիցքաթափման. ասել է ՌԴ Անվտանգության խորհրդի ղեկավարի տեղակալ Դմիտրի Մեդվեդևը:

«Այսօր բոլորի համար միանգամայն ակնհայտ է, որ (Արցախի) կարգավիճակի հարցն, իրոք, չի լուծվել, բայց դա հիմա հնարավոր չէ քննարկել, քանի որ կարգավիճակի շուրջ քննարկումների այս դաշտի ցանկացած էլեկտրականացում հանգեցնում է հզոր լիցքաթափման»,- ասել է նա ռուսական լրատվամիջոցներին տված հարցազրույցում:

Մեդվեդևը նաև նշել է, որ հակամարտության կողմերի դիրքորոշումներն այս հարցում «շատ տարբեր են, նույնիսկ Հայաստանի ներսում կան քննարկումներ»: «Եվ ես հիշեցնեմ, որ Հայաստանը չի ճանաչել Ղարաբաղի անկախությունը: Չգիտես՝ ինչու, նրանք մոռանում են դա, բայց իրականում այդպես է: Հետևաբար, ավելի լավ է կարգավիճակի հարցը հետաձգել մինչև հետագա ժամանակահատված»,- համոզված է ՌԴ Անվտանգության խորհրդի ղեկավարը: