ՏԵՍԱՆՅՈՒԹ․ Դատական գործընթաց ենք սկսել Շուռնուխի, Որոտանի անօրինական գործողությունների դեմ․ Արծվիկ Մինասյան

Նախարարը վստահեցրեց, որ ՀՀ արդարադատության նախարարությունում նման փաստաթուղթ չկա, և քանի որ այդպիսի փաստաթուղթ չի կարող ապագայում օդից ծնվել՝ առանց նախարարությունում առկայության, այս պահի դրությամբ հավաստիության կանխավարկած կարող է լինել՝ ըստ Yerkir.am-ի հայտարարեց ՀՅԴ Հայաստանի ԳՄ անդամ Արծվիկ Մինասյանը՝ մեկնաբանելով ՀՀ արդարադատության նախարար Ռուստամ Բադասյանի վստահեցումը, որ ինքը տեղյակ չէ որևէ փաստաթղթի մասին, որը հունվարի 11-ին Մոսկվայում ստորագրելու է Նիկոլ Փաշինյանը՝ վավերացնելով ՀՀ սահմանամերձ տարածքները Ադրբեջանին հանձնելու գործընթացը։

Արծվիկ Մինասյանը, սակայն, ասաց, որ սա չի նշանակում, որ պայքարը ավարտում են։

«Քանի որ հարց եղավ Շուռնուխի, Որոտանի և այլ տարածքների մասին, մենք հիմա դատական գործընթաց ենք սկսել այս անօրինական գործողությունների դեմ»,-տեղեկացրեց դաշնակցական գործիչը։

Նա ասաց, որ շուտով վարչական դատարան է ներկայացվելու նման պահանջ։ Մանրամասներ չասաց, բայց նպատակը կանխելն է հայկական տարածքների հանձնումը Ադրբեջանին՝ հետագայում դրանք հետ բերելու համար։

«Սովետական քարտեզը ինձ համար հիմք չէ, ինձ համար հիմք է այն փաստացի վերահսկողությունը, որը ես, որպես Հայաստանի Հանրապետություն, ունեմ, իմ տարածքը դա է, այլ ոչ է այն, ինչ փորձ են անում ներկայացնել՝ այդ թվում անկլավների հետ կապված։ ՀՀ տարածքը այն է, որտեղ իմ զինված ուժերը կան»,-ասաց Արծվիկ Մինասյանը։

Մանրամասն՝ տեսանյութում․