Լեռնային Ղարաբաղում ստեղծվել է եւս հինգ ռուսական մարդասիրական կենտրոն

Ռուսաստանի պաշտպանության նախարար, բանակի գեներալ Սերգեյ Շոյգուի հրամանով ականազերծման, հաշտեցման, տրանսպորտային, բժշկական եւ առեւտրակենցաղային ապահովման ռուսական մարդասիրական կենտրոններ են ստեղծվել՝ Լեռնային Ղարաբաղում խաղաղապահ գործողություն իրականացնելու համար: Այս մասին հայտնել են Պաշտպանության ազգային կառավարման կենտրոնում։

«Լեռնային Ղարաբաղում մարդասիրական բնույթի խնդիրների ամբողջ շրջանակը լուծելու համար Մարդասիրական արձագանքման միջգերատեսչական կենտրոնի (հումանիտար արձագանքի համակարգման «Հյուսիս» եւ «Հարավ» կենտրոններ, Ռուսաստանի ԱԻՆ-ի հետ համատեղ ջոկատ) կազմում ստեղծվել են հինգ լրացուցիչ կենտրոններ՝ Մարդասիրական ականազերծման կենտրոն, Պատերազմող կողմերի հաշտեցման կենտրոն (ներառյալ հոգեբանական աշխատանքի բաժինը, հեռուստառադիոհեռարձակման կայանները, «Խաղաղարարի տեղեկագիր»-ի խմբագրությունը), Տրանսպորտի աջակցության կենտրոն, Բժշկական աջակցության կենտրոն, Առեւտրակենցաղային ապահովման կենտրոն»,- հայտնում է ՏԱՍՍ-ը:

Պաշտպանության կառավարման ազգային կենտրոնում նշել են, որ Մարդասիրական արձագանքման միջգերատեսչական կենտրոնի կազմակերպչական միջուկը Ռազմատրանսպորտային ավիացիայի ինքնաթիռներով Լեռնային Ղարաբաղ է բերվել նոյեմբերի 19-ին: «2020 թվականի նոյեմբերի 20-ից այն կսկսի առաջնահերթ միջոցառումների իրականացումը»,- նշել են զինվորականները: