ՏԵՍԱՆՅՈՒԹ․ Կարծեմ` բոլոր չար և վատ դասերը սովորել ենք, և ժամանակն է՝ նորից երազենք․ Արմեն Սարգսյան

29 տարվա մեջ ունեցել ենք և՛ մեծ հաղթանակներ, և՛ դժվարություններ. ըստ Yerkir.am-ի` «Եռաբլուր» պանթեոնում լրագրողների հետ ճեպազրույցի ժամանակ հայտարարեց ՀՀ նախագահ Արմեն Սարգսյանը՝ ի սրտե շնորհավորելով բոլորին։

«Կարծեմ` բոլոր չար և վատ դասերը սովորել ենք, և ժամանակն է՝ նորից երազենք, որպեսզի ապագա 30 տարում կառուցենք իրական, ամուր, հզոր մեր պետությունը»,- ասաց նա։

Նախագահը նշեց, որ 30 տարի առաջ մեր ժողովուրդը դարերով երազանք ուներ՝ վերականգնել մեր անկախ պետականությունը, և 29 տարի առաջ այդ երազանքը ի կատար ածվեց:

Արմեն Սարգսյանը վստահ է, որ չկա որևէ մեկը, որ կարող է կառավարել մեզ․ այսպես նա պատասխանեց կարծիքներին, թե գլոբալացվող աշխարհում Հայաստանն անկախ չէ և գերտերությունների ազդեցության տակ է։

«Հավատացե՛ք ձեր ուժերին: Աշխարհում չկա որևէ մեկը, որ ինձ, ձեզ, մյուսներին կարողանա կառավարել: Մենք ուժեղ ենք: Եթե ձեզ թվում է՝ 29 տարի առաջ բոլորը սպասում էին, որ Հայաստանն անկախ լինի, սխալվում եք: Մենք` բոլոր հայերով, հավատացինք և ստացանք այն, ինչ ուզում էինք: Եթե այսօր էլ հավատանք, կարգապահ լինենք, կազմակերպված, հստակ նպատակ և ծրագիր ունենանք, ապա կհասնենք դրան»,- ասաց ՀՀ նախագահը:

Հիշեցնենք, որ այս տարի Հայաստանի Հանրապետության անկախության 29-ամյակին նվիրված տոնական միջոցառումները կանցկացվեն «Մեր հայրենիք» նշանաբանի ներքո, ինչը խորհրդանշում է աշխարհի բոլոր հայերի միասնականության ու ընդհանուր հայրենիքի գաղափարը: Համավարակով պայմանավորված՝ սեպտեմբերի 21-ին միջոցառումների զգալի մասը կանցկացվի առցանց:

Մանրամասն՝ տեսանյութում․