Կվերանորոգվի Ազգային պատկերասրահի՝ Մհեր Աբեղյանի մասնաճյուղը

Հայաստանի ազգային պատկերասրահի նախաձեռնությամբ՝ վերանորոգվում և արդիականացվում է պատկերասրահի՝ Մհեր Աբեղյանի մասնաճյուղը:

Պատկերասրահի «Ֆեյսբուքի» պաշտոնական էջում արված գրառման մեջ ասվում է, որ շուտով կվերաբացվեն բոլորովին նոր ցուցասրահներ՝ միջազգային չափանիշներին համապատասխանող թանգարանային լուսավորմամբ, գիտական էքսպլիկացիաներով (բացատրություններ) և նոր ցուցադրությամբ։

Արդիականացման վերաբերյալ հավելյալ տեղեկություններ կհրապարակվեն առաջիկայում:

Մասնաճյուղում ներկայացված են նկարչի յուղաներկ կտավները, պարբերաբար ցուցադրվում է նաև նրա գրաֆիկան:

Ժողովրդական նկարիչ Մհեր Աբեղյանի արվեստը ձևավորվել է 1930-1940 թվականների սկզբին գրաֆիկական, այնուհետև գեղանկարի ասպարեզում: Ստեղծագործական ողջ ուղու ընթացքում նկարիչը հավատարիմ է մնացել իր գեղարվեստական լեզվին, իր գեղարվեստական ձեռագրին` ընդլայնելով և հարստացնելով այն: