Թուրքական ԶԼՄ-ներին դուր չի եկել Քամալա Հարրիսի թեկնածության առաջադրումը. պատճառը գործչի հայամետ լինելն է

Երեկ երեկոյան պարզ դարձավ, որ ԱՄՆ նախագահի դեմոկրատ թեկնածու, նախկին փոխնախագահ Ջո Բայդենը որպես ապագա փոխնախագահի թեկնածու է ընտրել դեմոկրատ Քամալա Հարրիսին։

Բայդենի՝ նախագահ դառնալու դեպքում Հարրիսը կդառնա փոխնախագահի պաշտոնը զբաղեցրած առաջին սևամորթ կին գործիչը։

Տեղեկության տարածումից հետո թուրքական մի շարք ԶԼՄ-ներ մեծ ուշադրություն դարձրեցին գործչին. պատճառը Հարրիսի «անցյալն է», երբ իր գործունեության ընթացքում աչքի է ընկել հայանպաստ գործունեությամբ։

Հարրիսը 2019 թ. դեկտեմբերի 12-ին ԱՄՆ Սենատի կողմից ընդունված Հայոց ցեղասպանությունը ճանաչող բանաձևի համահեղինակներից է։

«Մարդկության պատմության ամենամութ ժամանակներից մեկը հանդիսացող Հայոց ցեղասպանությունը պատշաճ ձևով ճանաչելու համար մշտապես լինելու եմ հայ համայնքի կողքին», - գրել էր հնդկական և ջամայկական արմատներ ունեցող Հարրիսը, ով բազմիցս է անդրադարձել Հայոց ցեղասպանության ճանաչմանը։