ԱՄՆ էությունը. Խամենեին մեկնաբանել է Միննեապոլիսում ոստիկանության գործողությունները

Իրանի հոգևոր առաջնորդ Ալի Խամենեին ընդհանրություններ է գտել ամերիկյան ոստիկանության գործողությունների հետևանքով աֆրոամերիկացի Ջորջ Ֆլոյդի մահվան և այլ երկրների նկատմամբ Վաշինգտոնի պահվածքի միջև. գրում է «РИА Новости»-ն:

«Իրավիճակը, որն այսօր նկատվում է ԱՄՆ տարբեր քաղաքներում և նահանգներում, այն իրողությունների դրսևորումն է, որոնք թաքցվում էին, դրանում ոչ մի նոր բան չկա», - նշել է Խամենեին:

«Այն փաստը, որ մի ոստիկան, լիակատար սառնարյունությամբ, ծնկով սեղմում է սևամորթի պարանոցն այնպես, որ նա մեռնի՝ չնայած նրա աղոթքներին, իսկ մյուս ոստիկանները նայում են և ոչինչ չեն անում, նորություն չէ, սա Միացյալ Նահանգների էությունն է: Նրանք դա անում են ամբողջ աշխարհի հետ՝ Աֆղանստանում, Իրաքում, Սիրիայում և շատ այլ երկրների հետ», - եզրափակել է Իրանի առաջնորդը:

Նշենք, որ օրեր առաջ ԱՄՆ Միննեապոլիս քաղաքում ոստիկանի կողմից դաժանորեն սպանվել էր սևամորթ անզեն քաղաքացի։ Միջադեպը մեծ դժգոհություն է բարձրացրել ինպես ԱՄՆ-ում, այնպես էլ ամբողջ աշխարհում։