ԱՄՆ-ն և Իրանը պատրաստվում են կալանավորների փոխանակության

ԱՄՆ-ն կարող է Իրանի հետ փոխանակվել կալանավորներով և երկրից արտաքսել իրանցի գիտնական Սիրուս Ասգարիին. հայտնում է Reuters գործակալությունը։

Ըստ գործակալության՝ Վաշինգտոնում Պակիստանի դեսպանատանը Իրանը շահերի բաժնի ղեկավարի տեղակալ Աբոլֆազել Մեհրաբադին հայտարարել է, որ Ասգարին, ով կորոնավիրուսով է վարակվել, գտնվում է բժշկական վերահսկողության տակ և սպասում է երկրից դուրս գալու թույլտվությանը։

«Մենք աշխատում և համագործակցում ենք միգրացիոն ծառայության հետ, որպեսզի ինչքան հնարավոր է շուտ վերադարձնենք Իրան», - Մեհրաբադիի խոսքերն է մեջբերում «ՌԻԱ Նովոստին»։

ԱՄՆ Միգրացիոն և մաքսային ծառայության  ներկայացուցիչը ևս հաստատել է Ասգարիի արտաքսումը երկրից։

Փոխանակման գործընթացը դեռ մշակվում է. հավանական թեկնածուն ամերիկացի Մայքլ Ուայթն է, ով Իրանում ձերբակալվել էր 2018 թ.։