Մակրոնն աչքի է ընկել Երուսաղեմում՝ նախագահի լուսանկարիչ է աշխատել ու եկեղեցուց դուրս է քշել իսրայելցի ոստիկաններին

Ֆրանսիայի նախագահ Էմանուել Մակրոնը երեկ առաջիններից մեկն է ժամանել Երուսաղեմ՝ Հոլոքոստի հիշատակի միջազգային ֆորումին մասնակցելու, և արդեն հասցրել է ոչ միայն հանդիպել Իսրայելի նախագահ Ռուբի Ռիվլինի հետ ու լուսանկարվել նախագահական պալատում, այլ նաև՝ ընդհարվել Երուսաղեմի ոստիկանության հետ. ըստ yerkir.am-ի՝ հայտնում է news.israelinfo.co.il կայքը:

Մակրոնի բախումը ոստիկանների հետ տեսանկարահանել է ֆրանսիացի լրագրող Ավա Ջամշիդին: Ֆրանսիայի նախագահը վրդովվել է այն բանից, որ ոստիկանները Հին քաղաքի Վիա Դոլորոզա փողոցում գտնվող Սբ Աննա կաթոլիկ եկեղեցի իր այցից առաջ մտել են այնտեղ, մինչդեռ եկեղեցին պատկանում է Ֆրանսիայի դեսպանությանը: Մակրոնը կտրուկ ձևակերպումներով պահանջել է, որ ոստիկանները հեռանան եկեղեցուց: Նա նշել է, որ բարձր է գնահատում իսրայելական ոստիկանության աշխատանքը, սակայն պահանջում է հետևել օրենքին, որը «գործում է դարեր շարունակ», և լքել Ֆրանսիայի ինքնիշխան տարածքը:

Իսրայելական կայքը գրում է, որ այս օրերին Երուսաղեմում են լինելու աշխարհի 45 երկրից 50 բարձրաստիճան պաշտոնյաներ: Լրագրողները Հոլոքոստի հիշատակի ֆորումն անվանում են «Իսրայելի պատմության խոշորագույն դիվանագիտական իրադարձություն»: Կարգուկանոնը պահպանում և բարձրաստիճան հյուրերի անվտանգությունն ապահովում է մոտ 10 հազար ոստիկան:

Իսրայելի ոստիկանության մամուլի ծառայությունը հայտարարել է, որ Մակրոնի հետ կապված միջադեպն ավարտվել է  բարձրաստիճան հյուրի ներողությամբ, որը նշել է, թե չի ցանկացել վիրավորել ոստիկաններին:

Ի դեպ, մինչև այդ միջադեպը, Մակրոնը լրագրողների ուշադրությանն է արժանացել նախագահական պալատում իր պահվածքով. նա նախագահի մամուլի ծառայության պաշտոնական լուսանկարչից խնդրել է նրա լուսանկարչական ապարատը և անձամբ լուսանկարել նախագահ Ռիվլինի ու Կիպրոսի նախագահի հանդիպումը: «Ինչ հիանալի լուսանկարիչ»,- ֆրանսիացի հյուրին գովել է նախագահ Ռիվլինը: