Հրապարակում Ձմեռ պապիներն իրավունք չունեն քաղաքացուց փող ուզեն՝ ասել եմ՝ ձերբակալեք. փոխքաղաքապետ

Հրապարակում ձմեռ պապիներից որեւէ մեկն իրավունք չունի քաղաքացուց գումար ուզի՝ Երեւանի ավագանու նիստում հայտարարեց Երեւանի փոխքաղաքապետ Սերգեյ Հարությունյանը՝ անդրադառնալով դիտարկմանը, որ նման դեպք է արձանագրվել:

«Ես ոստիկանությանն ասել եմ, որ խիստ արձագանք տա նման դեպքում: Ամենայն հավանականությամբ, ինչ-որ մեկը գնում է եւ փորձում է այնտեղ կողքից փող աշխատել: Չկա տենց բան: Ձյունանուշիկներն ու Ձմեռ պապիները, որոնք մեզ մոտ քասթինգով անցել են, իրենք եւս փող ուզելու իրավունք չունեն»,-ասաց նա:

Քաղաքապետ Հայկ Մարությանի հարցին, թե ստացվում է, որ ինչ-որ մեկը Ձմեռ պապի շորով այնտեղ ժամանա՞կ է անցկացնում, փոխքաղաքապետը պատասխանեց. «Այդ հարցն ինձ էլ էր տանջում երկու օր, մինչեւ նրանցից մեկի հետ երկար զրույցից պարզեցի: Ասում է՝ մենք գալիս ենք մի երկու ժամ էստեղ աշխատում ենք, որի արդյունքում աչքի ենք ընկնում եւ ծնողները մեզ հաճախ հրավիրում են տուն, պայմանավորվածություն են ձեռք բերում: Այսինքն, թեյավճարի սկզբունք կարող է լինել, բայց փող ուզելու իրավունք չունեն, որովհետեւ իրենց քասթինգը անցնում է քաղաքապետարանում: Դա շատ հետաքրքիր պրոցես է: Իսկ փող ուզելու դեպքում, ես ոստիկանությանն ասել եմ, անմիջապես ձերբակալեք, որովհետեւ դա ապօրինի ձեռնարկատիրություն է»: