«Թեստ իվենթ»-ում պայքարն ավելի հեշտ կլինի. Արթուր Դավթյան

Մարմնամարզության Հայաստանի հավաքականի անդամ Արթուր Դավթյանի խոսքով` ապրիլին Ռիոյում կայանալիք «Թեստ իվենթ»-ում ավելի հեշտ կլինի պայքարը օլիմպիական խաղերի ուղեգրերի համար:

«Մեր մարմնամարզիկների ելույթներն իսկապես լավ ստացվեց: Վահագն Դավթյանն էլ իր հնարավորությունների չափով պայքարեց, բայց ավելին անել չհաջողվեց: Իմ վարժությունների դժվարությունը մի քիչ թուլացված էր, քանի որ գլխապտույտներ ունեի: Ես կարողացա վերականգնվել մինչև մրցումների մեկնարկը: Ռիոյի «Թեստ իվենթ»-ում ավելի հեշտ կլինի պայքարը, քան Գլազգոյում էր: Արտառոց բան չպատահելու դեպքում Ռիոյում ավելի թեթև կլինի»,- ասել է Դավթյանը: Այս մասին հաղորդում է ՀԱՕԿ պաշտոնական կայքը:  

Շոտլանդական Գլազգո քաղաքում ավարտված՝ մարմնամարզության աշխարհի վարկանիշային առաջնությունում Հայաստանի հավաքականի անդամ Հարություն Մերդինյանը (նժույգթափեր) վարժությունում, հավաքելով 15.500 միավոր, դարձել է մարմնամարզության աշխարհի առաջնության բրոնզե մեդալակիր: Հայ մարմնամարզիկը ապահովել է օլիմպիական խաղերի ուղեգիր: Մարմնամարզիկներ Հուրի Գեբեշյանը և Արթուր Դավթյանը իրավունք են ստացել մասնակցելու Ռիոյում կայանալիք «Թեստ իվենթ»-ին և աշխարհի առաջնությունում գրանցած արդյունքները կրկնելու դեպքում կնվաճեն օլիմպիական խաղերի ուղեգիր: