Երևանն ու Բաքուն քննարկում են գերիների փոխանակման հարցը. Զախարովա

Հայաստանն ու Ադրբեջանը շարունակում են քննարկել գերիների փոխանակման հարցը. այս մասին, ըստ Yerkir.am-ի, ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:

«Այս խնդիրը մշտապես գտնվում է բանակցությունների օրակարգում և այն առանձին քննարկվել է դեռ ապրիլ ամսին ԵԱՀԿ ՄԽ համանախագահների մասնակցությամբ Մոսկվայում կայացած Ռուսաստանի, Հայաստանի և Ադրբեջանի ԱԳՆ ղեկավարների հանդիպման ժամանակ», - հայտարարել է Զախարովան:

Հիշեցնենք, որ Արցախում գտնվող ադրբեջանցիներն են դիվերսանտներ Դիլհամ Ասկերովն ու Շահբազ Գուլիևը, որոնք ապօրինաբար Արցախի պետական սահմանը հատելու, ապօրինի կերպով հրազեն և ռազմամթերք կրելու, մարդուն բացահայտ առևանգելու և սպանության համար դատապարտվել էին համապատասխանաբար ցմահ և 22 տարի ժամկետ ազատազրկմամբ: Նրանք 2014 թվականի հուլիսի 4-ին առևանգել էին Արցախի անչափահաս քաղաքացի Սմբատ Ցականյանին, որի մարմինը հրազենային վնասվածքներով հայտնաբերվել էր հուլիսի 15-ին Քարվաճառ և Մանաշիդ համայնքների միջև ընկած անտառային զանգվածում: