Հետևելով վարչապետի էջին՝ հպարտանում ենք, իսկ օդակայանում՝ հասկանում. էսպես չի լինի. Դավիթ Վանյան

Դավիթ Վանյանն իր ֆեյսբուքյան էջում գրում է.

«Այսօրվա աշխարհում, ժամանակակից հեղափոխությունների ամենամեծ սխալն ու, միևնույն ժամանակ առանձնահատկությունը նրանում է, որ առաջնորդողները գնում են համագործակցության կատարյալ ապազգային համաշխարհային գլոբալիստական ուժերի հետ ու ստիպված են լինում ներդնել նրանց արժեքների համակարգը՝ սեփական երկրներում։

Կյանքում ամեն ինչ գին ունի։ Եթե ոչ, ապա դա լոկ թակարդում դրված պանրի կտորն է։

Եւ ստացվում է, որ նոր կամ հեղափոխական իշխանությունները արդարացիորեն քննադատելով հներին, անարդարացիորեն քննադատում են նաև ազգայինը, ավանդականը, հիմնարարը։ Այսինքն, արհեստականորեն առաջացած օնտոգոնիստական գիծը անցնում է ազգայինի ու համամարդկայինի միջով, մինչդեռ մեր ժողովուրդն ու ազգը երբեք չի առանձնացել ազգայնականությամբ կամ մարդատյացությամբ, կամ միշտ է եղել համամարդկային։ Նարեկացի կարդացեք, կամ Սայաթ Նովա։ Իսկ սա աննկատ խարխլում է արմատների բարդ, անտեսանելի համակարգը, որը "Հեղափոխություն" անվան տակ կտրում է մեզ մեր ազգին բնորոշ կենարար երակներից։ Ինչպես է անտառում աննկատ չորանում որևէ ծառատեսակ, ասենք՝ թեղին։ Հենց այդպես, ժամանակակից տեխնոլոգիական որևէ նորամուծություն աննկատ խանգարում է նրա կենսագործունեությանը։ Այդ է պատճառը, որ երբ հետևում ենք վարչապետի էջին, ակամա լցվում ենք հպարտությամբ, իսկ երբ գնում ենք օդանավակայան և տեսնում արտագաղթողներին, սթափվում ենք ու հասկանում, որ այսպես այլևս չի լինի։