Հայաստանի վրա մեծ ճնշումներ կան, պայման է դրված՝ կա՛մ Ստամբուլյան կոնվենցիան ստորագրվում է, կա՛մ դադարեցվում են բոլոր տեսակի հարաբերությունունները. Վահագն Չախալյան

Հայաստանի Հանրապետությունում Ստամբուլյան կոնվենցիան չի՛ վավերացվելու՝ անկախ նրանից, թե ինչ մեծ ճնշումներ կգործադրվեն պետության վրա. հայտարարեց այս պահին ԱԺ բակում անցկացվող բողոքի ակցիայի և ստորագրահավաքի կազմակերպիչ, հայկական արժեքների պաշտպանության «Կամք» հասարակական նախաձեռնության հիմնադիր Վահագն Չախալյանը:

Yerkir.am-ի թղթակիցը  ԱԺ-ի բակից հայտնում է, որ  բողոքի ակցիայի կազմակերպիչները վստահ են՝ Ստամբուլյան կոնվենցիայի վավերացման պահանջը զուգորդվում է ճնշումներով: 

«Մենք ունենք հստակ տեղեկություն, որ Հայաստանի վրա շատ մեծ ճնշումներ կան: Անգամ, այսպես ասած, պայման է դրվում՝ կա՛մ փաստաթուղթը ստորագրվում է, կա՛մ դադարեցվում են բոլոր տեսակի հարաբերություններն ու առաջընթացի հույսը: Բայց այստեղ մեր ազգային գոյության ձևի և տեսակի պահպանման հարցն է»,- նշեց Չախալյանն ու հավելեց. «Եվրոպական հանձնախումբը, որ կոչվում է պատվիրակություն, իսկ ես կասեի՝ ՀՀ-ում իջեցված դեսանտ, եկել են և հանդիպումների ձևաչափով փորձում են արագացնել Ստամբուլյան կոնվենցիայի վավերացման հարցը: Այսօրվա նիստն էլ կայացել է կոնկրետ ճնշումների ներքո: Այն հանգամանքը, որ ուղիղ եթեր չկա, ապացուցում է, որ գործընթացը թաքուն է պահվում ՀՀ քաղաքացիներից: Մենք՝ բոլորս, գիտենք, որ ՀՀ իշխանությունը ժողովուրդն է, այսինքն՝ հիմա ստացվում է, որ ժողովրդից թաքուն է պահվում, թե ինչ է քննարկվում ԱԺ-ում: Մենք հավաքվել ենք այստեղ, որպեսզի պահանջենք ուղիղ եթեր, լսենք, թե ի՞նչ է քննարկվում ներսում: Եթե իսկապես այնպես է, ինչպես իրենք են ասում, թե քննարկումներն ընդամենը բռնության դեմ են, ապա ինչի՞ց են նրանք վախենում»: