Մարդիկ կկարողանան վայրէջք կատարել Մարսի վրա 2035-ին. NASA

Մարդիկ 2035-ին կկարողանան վայրէջք կատարել Մարս մոլորակի վրա. հայտնում է Space.com-ը՝ վկայակոչելով NASA-ի վարչական բաժնի ղեկավար Ջիմ Բրիդենսթայնին:

«Եթե մենք արագացնենք Լուսնի վրա վայրէջքի ժամկետները, հետևաբար՝ կարագացնենք նաև Մարսի վրա վայրէջքի ժամկետները: Ես այն կարծիքին եմ, որ մենք դա կկարողանանք անել արդեն 2035-ին»,- Տիեզերագնացության միջազգային կոնգրեսում հայտարարել է նա:

Ամիսներ առաջ՝ ապրիլին, Բրիդենսթայնը նաև հայտարարել էր, որ 2033-ին NASA-ի տիեզերագնացները կհայտնվեն Կարմիր մոլորակի մակերևույթին: «Մենք պետք է սովորենք ապրել ու աշխատել այլ աշխարհում: Լուսինը լավագույն վայրն է այդ հնարավորություններն ու տեխնոլոգիաներն ապացուցելու համար»,- պարզաբանել էր նա:

Տիեզերագնացության միջազգային կոնգրեսում ելույթ է ունեցել նաև ԱՄՆ փոխնախագահ Մայք Փենսը: Իր խոսքում նա անդրադարձել է NASA-ի «Արտեմիդա» ծրագրին, որի նպատակն է 2024-ին Լուսին վերադարձնել տիեզերագնացներին, նաև նշել է, որ այն ցատկահարթակ է դեպի Մարս հնարավոր առաքելության համար: