Կրեմլն ակնկալում է, որ Էրդողանը Պուտինին կտեղեկացնի Սիրիայում Թուրքիայի հետագա պլանների մասին

Կրեմլն ակնկալում է, որ Թուրքիայի նախագահ Ռեջեփ Թայիփ Էրդողանը Սոչիում կայանալիք բանակցությունների ընթացքում Ռուսաստանի նախագահ Վլադիմիր Պուտինին կհայտնի «Խաղաղության ակունք» ռազմական գործողության շրջանակում հետագա պլանների մասին. հայտնում է ՏԱՍՍ-ը: 

«Ռուսաստանը ցանկանում Է քննարկել իրավիճակը Սիրիայի հյուսիս-արևելքում, ավելի լավ հասկանալ տեղի ունեցող իրադարձությունները, տեղեկատվություն ստանալ Թուրքիայի ծրագրերի մասին եւ դրանք համադրել Սիրիայում քաղաքական կարգավորման առաջմղման ընդհանուր պլանների հետ»,- լրագրողներին տեղեկացրել է ՌԴ նախագահի մամուլի քարտուղար Դմիտրի Պեսկովը:

Նա ասել է նաև, որ Սիրիայի շուրջ Ռուսաստանի և Թուրքիայի ղեկավարների առաջիկա բանակցությունները բարդ են լինելու: «Թեմաները բազմազան են, բանակցությունները շատ բարդ են լինելու, ինչն ակնհայտ է»,- մանրամասնել Է Պեսկովն ու հավելել, որ առաջիկա զրույցը չի կարող կարճ տևել: