Էրդողանը զանգահարել է Պուտինին՝ Սիրիայում իրավիճակը քննարկելու համար

ՌԴ նախագահ Վլադիմիր Պուտինը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ. հայտնում է ՌԻԱ «Նովոստի»-ն՝ վկայակոչելով Կրեմլի մամուլի ծառայության հայտարարությունը:

Հեռախոսազրույցը կայացել է թուրքական կողմի նախաձեռնությամբ: Երկու երկրների ղեկավարները քննարկել են Սիրիայում տիրող իրավիճակը, շեշտել թուրքական զինված ուժերի ստորաբաժանումների և սիրիական կառավարական բանակի միջև բախումները կանխելու անհրաժեշտությունը: Բացի այդ՝ պետությունների ղեկավարները վերահաստատել են Սիրիայի տարածքային ամբողջականությունն ապահովելու՝ իրենց հանձնառությունը:

Պուտինը և Էրդողանը անդրադարձել են նաև սիրիական խնդրի քաղաքական լուծման կարևորությանը և պայմանավորվել աջակցել հոկտեմբերի վերջին Ժնևում, ՄԱԿ-ի հովանու ներքո, Սահմանադրական հանձնաժողովի նիստի անցկացմանը:

Պուտինը հրավիրել է Էրդողանին առաջիկա օրերին աշխատանքային այց կատարել Ռուսաստան: Թուրքիայի նախագահն ընդունել է հրավերը: