Կրեմլն անդրադարձել է Փաշինյանի, Պուտինի ու Ալիևի «հայտարարության» մասին հրապարակումներին

Ռուսաստանի Դաշնության նախագահի մամուլի քարտուղար Դմիտրի Պեսկովը, մեկնաբանելով սոցիալական ցանցերում հայտնված՝ ՀՀ վարչապետի պաշտոնակատար Նիկոլ Փաշինյանի, Ռուսաստանի և Ադրբեջանի նախագահներ Վլադիմիր Պուտինի և Իլհամ Ալիևի ենթադրյալ «հայտարարության» տեքստը սահմանազատման խնդրի վերաբերյալ, կոչ է արել զուսպ վերաբերվել նման «խենթ հրապարակումներին» և կենտրոնանալ պաշտոնական աղբյուրների վրա, քանի որ դա փխրուն թեմա է, և շատ լուրջ ջանքեր են գործադրվում իրավիճակը կարգավորելու համար:

«Ընդհանրապես, սա այնքան փխրուն թեմա է, և այդ իրավիճակը կարգավորելու համար այնքան լուրջ ջանքեր են գործադրվում, որ դուք պետք է շատ զուսպ լինեք նման խենթ հրապարակումների հետ գործ ունենալիս և կենտրոնանաք միայն պաշտոնական աղբյուրների վրա»,- ասել է Պեսկովը «ՌԻԱ Նովոստի»-ին՝ ի պատասխան սոցիալական ցանցերում նախորդ օրը հայտնված եռակողմ հայտարարության տեքստը մեկնաբանելու խնդրանքին: