Եթե երեխան սոված է, մարդն ամեն ինչի տակ կստորագրի. կառավարությունը պիտի քայլեր ձեռնարկի. բողոքի ցույց՝ ընդդեմ վարկային կազմակերպությունների

«Հանուն սոցիալական արդարության» կուսակցությունը կառավարության շենքի առջև պահանջում է օրենսդրական փոփոխություններ կատարել, որոնք կարգելեն վարկային կազմակերպություններին՝ տրամադրել այնպիսի վարկեր, որոնք մարդկանց գցում են անելանելի վիճակի մեջ:

«Այս ամիսների ընթացքում մեր կուսակցությունը բազմաթիվ բողոքներ է ստացել: Մարդիկ խնդրում են, որ այս վաշխառու կազմակերպությունների գործունեությունը Հայաստանում դադարեցվի: Ամիսներ շարունակ ՀՀ-ում արտակարգ դրություն էր, մարդիկ հնարավորություն չունեին իրենց երեխաներին կերակրելու, մարդիկ կորցրել են աշխատանքն ու հնարավորություն չունեն օրվա հացի գումարը վաստակելու: Եթե մարդիկ հայտնվել են անելանելի իրավիճակի մեջ՝ չի նշանակում, որ բանկերն ու վարկային կազմակերպությունները դրանից պիտի օգտվեն, իսկ կառավարությունը չպիտի մտածի այդ հարցը լուծելու մասին»,- հայտարարեց ակցիայի մասնակիցներից մեկը:

Նա ընդգծեց, որ մարդիկ վերցնում են 150-200 հազար դրամի չափով վարկ և ստիպված են լինում կրկնակի վճարել դրա դիմաց:

Դիտարկմանը, թե վարկ վերցնելու ժամանակ մարդիկ ստորագրում են այդ պայմանների տակ, ակցիայի մասնակիցները պատասխանեցին. «Եթե երեխան սոված է, մարդն ամեն ինչի տակ կստորագրի: Կառավարությունը պիտի մտածի այդ մասին»:

Նրանք նշեցին, որ նամակ են հանձնել կառավարությանն ու այսօր նույնաբովանդակ նամակ կհանձնեն նաև ԱԺ նախագահին: