Իրանը Վիեննայի նիստը «կառուցողական» է որակել

Իրանը Վիեննայում կայացած` Միջուկային համապարփակ համաձայնագրի համատեղ հանձնաժողովի արտահերթ նիստը «կառուցողական» է որակել: Այս մասին հայտարարել է նիստի համանախագահ, քաղաքական հարցերով Իրանի ԱԳ նախարարի տեղակալ Սեյեյդ Աբաս Արաղչին. հաղորդում է ԻՌՆԱ-ն:

«Նիստն ընթացավ կառուցողական մթնոլորտում: Բազմաթիվ խնդիրներ արծարծվեցին: Ես չեմ կարող ասել, որ մենք լուծել ենք բոլոր հարցերը, բայց կարող եմ նշել, որ նիստի մասնակիցները վճռական են տրամադրված Միջուկային գործարքը փրկելու հարցում»,- նիստից հետո լրագրողների հետ հանդիպման ժամանակ ասել է Արաղչին:

Իրանի ԱԳ նախարարի տեղակալը շեշտել է, որ Թեհրանը կշարունակի կրճատել համաձայնագրով ստանձնած իր պարտավորությունները, քանի դեռ չեն բավարարվել Իրանի պահանջները:

Արաղչին նաեւ հայտնել է, որ ԱԳ նախարարների մակարդակով հանդիպումը կարող է տեղի ունենալ առաջիկայում։ «Մենք քննարկել ենք նախարարների մակարդակով հանդիպում գումարելու հնարավորությունը, որը կարող է տեղի ունենալ առաջիկայում եւ պսակվել հաջողությամբ։ Հստակ օրը դեռ հայտնի չէ»,-ասել է նա։

Նիստի քննարկումներին եւ արդյունքներին է անդրադարձել նաեւ Չինաստանի պատվիրակության ղեկավարը: Ըստ նրա՝ եվրոպական կողմն Իրանին կոչ է արել կատարել Միջուկային գործարքի դրույթները: Իր հերթին, Թեհրանն ընդգծել է, որ Եվրոպան պետք է կատարի գործարքի` իրեն վերաբերող դրույթները: Բացի այդ` նիստի մասնակիցները դժգոհություն են հայտնել Վաշինգտոնի կողմից Թեհրանի նկատմամբ միակողմանի կարգով նոր պատժամիջոցներ սահմանելու որոշման կապակցությամբ՝ դրանք համարելով անընդունելի: