Կդյուրացվի պետպատվերի տրամադրման կարգը. առողջապահության նախարար

Կառավարությունն այսօրվա նիստում հաստատեց «Պետության կողմից երաշխավորված անվճար բժշկական օգնություն և սպասարկում իրականացնող` առևտրային կազմակերպությունների ֆինանսատնտեսական հաշվետվության օրինակելի ձևը  հաստատելու մասին» որոշման փոփոխությունները, որոնք պարզեցնում են ընթացակարգը:

Հարցը ներկայացրեց առողջապահության նախարար Արսեն Թորոսյանը`նշելով. «Մենք մեզ հետ պայմանագրեր կնքած շուրջ 500 բժշկական հաստատությունների համար պարզեցնում ենք հաշվետվողականության պրոցեսը, որ նրանք ներկայացնում էին ամսական, եռամսյակային և տարեկան կտրվածքով: Պարզեցնում ենք և դարձնում միայն մեկ հաշվետվություն, որն ամբողջական ու համապարփակ է: Սրանով մենք հնարավորություն ենք տալիս, որ ամեն օր թուղթ չլրացնեն մեզ համար, հաճախ այնպիսի թղթեր, որոնք երբևէ չեն օգտագործվել, տվյալներ, որոնց կարիքը չի էլ եղել»:

Նախարարը մանրամասնեց նաև, որ մեկ այլ նախագիծ ևս պատրաստվում է, որով կդյուրացվի պետպատվերի տրամադրման կարգը: «Դա էլ բավականին երկարատև, բյուրոկրատական քաշքշուկներով լի պրոցես է եղել: Աշնանը կընդունենք, և հաջորդ տարվանից այդ պրոցեսն ավելի դյուրին կլինի: Մոտ 500 կազմակերպությունների համար էական բարելավում է լինելու»,- բացատրեց նա: