Հայրենիք ունենալը բախտավորություն է, հայ լինելը` հպարտություն. մեկնարկել է Համազգային Հայ Կրթական և Մշակութային Միության 25-րդ ուսանողական հավաքը

Երեկ` հուլիսի 15-ին, Երևանում մեկնարկեց Համազգային Հայ Կրթական և Մշակութային Միության 25-րդ ուսանողական հավաքը: Աշխարհի 9 երկրներից 30 ուսանողներ եկել են մասնակցելու Համազգայինի` արդեն ավանդույթ դարձած հավաքին:

Հավաքը բացեց ֆորումի ընդհանուր պատասխանատու Խաչիկ Դեմիրճյանը: Նա, կարևորելով ուսանողական այս հավաքը, նշեց, որ այն նպատակ ունի երիտասարդներին ճանաչել տալու ոչ միայն հայրենիքի տեսարժան վայրերը, այլև հաղորդակից դարձնելու հայոց պատմությանն ու մշակույթին:

Երիտասարդներին ողջունեցին նաև ՀՀԿՄՄ-ի կենտրոնական վարչության անդամ Վիգեն Քյուֆենկչյանը, Երևանի գրասենյակի ղեկավար Ռուզաննա Առաքելյանը:

Առաջիկա օրերին ուսանողները կլինեն նաև Արցախում:

ՀՀԿՄՄ-ն համոզված է, որ այս առիթը մեր երիտասարդների համար էլ ավելի համոզիչ կդարձնի այն ճշմարտությունը, որ հայրենիք ունենալը բախտավորություն է, հայ լինելը` հպարտություն: