Աղետի գոտում բնակարանային խնդրի լուծման համար կհատկացվի 3 միլիարդ դրամ

Քաղաքաշինության պետական կոմիտեի նախագահ Վահագն Վերմիշյանն ամփոփել է աշխատանքային 100 օրը:

2021 թվականին, ըստ նրա, երկրաշարժի հետեւանքով անօթեւան մնացած շահառու ընտանիքների բնակարանային խնդիրներն արդեն լուծված կլինեն: Վահագն Վերմիշյանը նշել է, որ Շիրակի, Լոռու եւ Արագածոտնի մարզերում շահառու ճանաչված 5396 ընտանիքից 2008-2017 թվականներին լուծվել է 4839-ի բնակարանային խնդիրը: 2018 թվականին պետբյուջեից հատկացված 460 միլիոն դրամով 44 ընտանիքի բնակարանային խնդիր է լուծվել:

Այս տարի նախատեսված է 560 միլիոն դրամ՝ 60 ընտանիքի բնակարանային խնդրի լուծման համար:

«Վարչապետի հանձնարարականով՝ 2020 թվականին մնացած 453 ընտանիքներին, որպեսզի ապահովենք բնակարանով, հաշվարկային ստացել ենք 3 միլիարդ դրամ: Մեկընդմիշտ, վերջնականապես այդ հարցը փակվի, 2021 թվականին «աղետի գոտու շահառու» հասկացությունը պետք է վերանա: Տնակները պետք է վերացվեն, դարձվեն շինանյութ: Որպես կանոն՝ այդ տնակները գտնվում են քաղաքի տարածքում, զբաղեցնում են հանրային տարածքներ, շատ դեպքերում այգիներ, սպորտային տարածքներ, փողոցների մայթեր և այլն»,- ասաց Վերմիշյանը: