Շրջանառության մեջ է դրվել նոր նամականիշ՝ նվիրված «Սպորտ. հայ անվանի ֆուտբոլիստներ. Հենրիխ Մխիթարյան» թեմային

Հունիսի 4-ին Հայաստանի ֆուտբոլային ֆեդերացիայի տեխնիկական կենտրոնում «Հայփոստ» ՓԲԸ-ի կողմից մարվեց և շրջանառության մեջ դրվեց նամականիշ՝ նվիրված «Սպորտ. հայ անվանի ֆուտբոլիստներ. Հենրիխ Մխիթարյան» թեմային: 

450 ՀՀ դրամ անվանական արժեքով նամականիշը տպագրված է 40 000 տպաքանակով Կանադայի Lowe Martin Group տպագրատանը: Նամականիշի դիզայնի հեղինակն է «ՀայՓոստ» ՓԲԸ-ի գլխավոր դիզայներ Վահագն Մկրտչյանը:

Նամականիշի վրա պատկերված է հայ անվանի ֆուտբոլիստ, Հայաստանի ֆուտբոլի ազգային հավաքականի ավագ Հենրիխ Մխիթարյանը՝ Հայաստանի հավաքականի մարզաշապիկով: Մխիթարյանի դիմանկարը կատարված է համակարգչային գրաֆիկայի եղանակով:

Նամականիշի մարումն իրականացրեցին ՀՀ բարձր տեխնոլոգիական արդյունաբերության փոխնախարար Գեղամ Վարդանյանը, Հենրիխ Մխիթարյանը, «ՀայՓոստ» ընկերության խորհրդի նախագահ Խուան Պաբլո Գեչիջյանը, ՀՀ Ֆիլատելիստների միության նախագահ Հովիկ Մուսայելյանը:

Միջոցառման ավարտին Հենրիխ Մխիթարյանը Խուան Պաբլո Գեչիջյանին նվիրել է Հայաստանի ազգային հավաքականի մարզաշապիկ՝ իր ստորագրությամբ: