Նոր նամականիշ՝ նվիրված «Եվրոպա 2017. Ամրոցներ» թեմային

Հուլիսի 10-ին մարվեց և շրջանառության մեջ դրվեց մեկ նամականիշ՝ նվիրված «Եվրոպա 2017. Ամրոցներ» թեմային: 

Նամականիշի մարումն իրականացրին ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, Հայաստանում ԵՄ պատվիրակության ղեկավար, դեսպան Ն.Գ. Պյոտր  Սվիտալսկին, Եվրոպական հանձնաժողովի Հարևանության և ընդլայնման հարցերով գլխավոր տնօրինության Հայաստանի, Բելառուսի, Ադրբեջանի և Արևելյան գործընկերության հարցերով բաժնի ղեկավար  Վասիլիս Մարագոսը, «ՀայՓոստ Թրասթ Մենեջմենթի» գլխավոր տնօրեն Խուան Պաբլո Գեչիջյանը, ՀՀ Ֆիլատելիստների միության նախագահ Հովիկ Մուսայելյանը: 

Նամականիշի վրա պատկերված է Ամբերդի ամրոցը։ Պատկերի ներքևում՝ հայերեն և անգլերեն լեզուներով, միջնադարյան ոճով գրված է ամրոցի անվանումը։  Այն թողարկվել է Եվրոպայի փոստային օպերատորների ասոցիացիայի (ՓոստԵվրոպա) անդամ-երկրների «EUROPA» միջազգային համատեղ թողարկման շրջանակներում:

Նամականիշն ունի 350 ՀՀ դրամ անվանական արժեք: Այն տպագրված է Ֆրանսիայի "Cartor” տպագրատանը: Նամականիշի չափսերն են` 50,0 x 25,7 մմ։ Տպաքանակը՝ 50 000 հատ։