Արցախում է ԱՄՆ-ի «Ֆերահյան» ազգային վարժարանը

Մայիսի 29-ին, «Ֆերահյան» ազգային վարժարանի ուսուցիչներն ու սաները հանդիպել են Արցախի բազմազավակ ընտանիքներին:

Հանդիպմանը ներկա էին ԱՀ ԱԺ «Դաշնակցություն» խմբակցության պատգամավոր, ԱԺ սոցիալական եւ առողջապահության հարցերի մշտական հանձնաժողովի անդամ Ռիտա Մնացականյանն ու ՀՅԴ Արցախի պատանեկան միության ներկայացուցիչ Մանուշակ Բալասանյանը:

50-ամյա կենսագրություն ունեցող Ֆերահյան ազգային վարժարանն ԱՄՆ-ի առաջին ամենօրյա դպրոցն է: Այստեղ սաներն ուսանում են հայոց լեզու, պատմություն, գրականություն, Հայ դատ, կրոն, երգ, պար։

2000թ-ից «Ֆերահյան» ազգային վարժարանի ուսուցիչներն ու 11-րդ դասարանի աշակերտները պարբերաբար Արցախ են այցելում՝ բազմազավակ եւ զոհված ազատամարտիկների ընտանիքներին սոցիալապես աջակցելու բարեգործական ծրագրով:

Այցի նպատակն է ոչ միայն դրամական օգնություն ցուցաբերել Արցախի ժողովրդին, այլեւ հայրենիքի մասին ունեցած պատկերացումները լրացնել Արցախը տեսնելու ու զգալու բաղձալի երազանքով:

«Հայրենաբաղձությունն ու հայրենիքին օգտակար լինելու փափագն է մեզ բերում Արցախ: Աշակերտներից մեկն անգամ զարմանքով եւ հիացմունքով ասաց՝ ուր գնում ենք՝ հայերեն են խոսում: Թող Արցախի երեխաները շատանան ու զորանան, իսկ մենք կաջակցենք նրանց»,- նշեց վարժարանի տնօրեն Սոսի Շանլյանը:

Վարժարանի ուսուցիչների խոսքերով՝ ապրելով Արցախից հեռու, դա նվազագույնն է, որ կարող են անել հարազատ երկրի բարեկեցության համար: Դրանով նրանք վարժարանի սաների մեջ սերմանում են ուրիշներին ձեռք մեկնելու, օգնելու կարողություններ:

Վարժարանի 11-րդ դասարանի սան Եվգենյա Հարությունյանն ասաց, որ եկել են Արցախի երեխաներին ուրախություն պատճառելու:

«Մենք ապրում ենք բարեկեցիկ կյանքով, իսկ Արցախի երեխաները դժվարություններ են տեսնում: Ցանկանում ենք նրանց մասամբ տալ այն ամենը, ինչ ունենքմենք»,-հավելեց նա:

Հասմիկ ՀԱԿՈԲՅԱՆ

aparaj.am