Ապե՛ր, հլը դուրս արի. ավագանու ԲՀԿ-ական անդամը դուրս հրավիրեց իմքայլականին իրեն անթարթ, սևեռուն ու երկար նայելու համար

Երևանի ավագանու այսօրվա նիստում միջադեպ տեղի ունեցավ ավագանու «Իմ քայլը» և ԲՀԿ խմբակցությունների  անդամների միջև: 

ԲՀԿ անդամ Արմեն Ներսիսյանը նիստի ընթացքում տեղից վեր կացավ և դիմեց «Իմ քայլը» խմբակցության անդամ Վազգեն Դարբինյանին «ապե՛ր, հլը դուրս արի» խոսքերով:

Լրագրողների հետ զրույցում Ներսիսյան նշեց, որ Վազգեն Դարբինյանին իրեն երկար, սևեռուն նայելու համար է դուրս հրավիրել: Նա նաև հավելեց, որ այդտեղ որևէ վատ բան չկա, ընդամենը քննարկման հրավեր է: 

Միջադեպից հետո «Իմ քայլը» խմբակցության անդամ Լիլիթ Կիրակոսյանը հանդես եկավ էթիկայի խորհուրդ ստեղծելու առաջարկությամբ: «Ինչպես ցույց տվեց մեր այսօրվա նիստը և, առհասարակ, բոլոր նիստերը, անհրաժեշտություն եմ տեսնում և առաջարկում եմ ստեղծել էթիկայի խորհուրդ, ինչպես ԱԺ-ում է: Այն կհսկի և´ ֆեյսբուքյան գրառումները, և´ նիստում հնչեցված «դուրս արի, ապե', խոսենք» արտահայտությունները»,- նշեց նա:

Հայկ Մարությանին առաջարկը հետաքրքրեց: «Ինձ դուր է գալիս այս առաջարկությունը: Կարծում եմ՝ ձեռնամուխ կլինենք»,- նշեց նա: