Այ ՛ Financial Times, տեղը չե՞ս բերում 4 մլն փախստականի ապաստան տված Թուրքիային. Էրդողան

Թուրքիայի նախագահ Ռեջեփ Թայիփ Էրդողանը, մասնակցելով «Գործի ապագան» անունը կրող ծրագրին, 2019թ. մարտի 31-ի ՏԻՄ ընտրություններից հետո առաջ անգամ երկարատև ելույթ է ունեցել, որում անդրադարձել է վերջին շրջանում Թուրքիայում և Թուրքիայի շուրջ տեղի ունեցող զարգացումներին: Մասնավորապես` ուշադրություն է հրավիրել միջազգային առաջատար մամուլի այն հրապարակումներին, որոնցում նշվում է, որ Թուրքիայում տնտեսական դրությունն աղետալի վիճակում է. հաղորդում է haberturk.com կայքը:

Անգլիական Financial Times պարբերականը, երեկ ծավալուն հոդվածով անդրադարձել էր Թուրքիայի տնտեսական դրությանը, որում նշված էր, որ Թուրքիան Կենտրոնական բանկի պահուստները հզորացնելու նպատակով կարճաժամկետ պարտքերն է օգտագործում: Ի պատասխան այս հրապարակմանը` Էրդողանն ասել է. «Այ ՛ Financial Times, 4 մլն փախստականի ապաստան տված Թուրքիային տեղը չե՞ս բերում: Քո երկրում քանի՞ փախստական կա: Ինչ ուզում եք` գրեք: Թուրքիան ոտքի վրա պինդ կանգնած է»:

Էրդողանը նաև կոչ է արել Թուրքիայի բոլոր քաղաքացիներին միավորվել: «Մեր երկրի անվտանգության հարցերում պետք է մի կողմ դնենք մեր քաղաքական հայացքները և բոլորս միասին` 82 միլիոնով, Թուրքիայի դաշինք կազմած, պետք է առաջ շարժվենք»: