Թուրքիայի հետ մի խոսացեք սպառնալիքների լեզվով. Էրդողանի խոսնակ

Թուրքիայի նախագահի խոսնակ Իբրահիմ Քալընը, ելույթ ունենալով թուրք-ամերիկյան 37-րդ ամենամյա համաժողովում, անդրադարձել է ռուս-թուրքական և թուրք-ամերիկյան հարաբերություններին: Մասնավորապես, անդրադառնալով Ս-400 ՀՕՊ համակարգերի գնմանը, նշել է, որ Թուրքիան վերջին 10 տարիների ընթացքում անընդհատ փորձել է գնել ամերիկյան «Պատրիոտ» համակարգերը, քանի որ չուներ հզոր հակաօդային պաշտպանություն. հաղորդում է haberturk.com կայքը:

Հույս հայտնելով, որ Թրամփը կմիջամտի ԱՄՆ Կոնգրես ներկայացված` Թուրքիայի նկատմամբ պատժամիջոցների առաջարկին, Քալընը նշել է. «Բազմիցս նշել եմ` սպառնալիքներն ու պատժամիջոցները ոչ մի օգուտ չեն տալու և  ոչ մի դրական արդյունքի չեն հանգեցնի: ԱՄՆ-ի հետ, անշուշտ, այս թեմայով չենք ցանկանում առճակատում ունենալ, բայց բոլորը պետք է հասկանան, որ Թուրքիան անհանգստություններ ունի անվտանգության ոլորտում»:

Խոսելով Իրանի նկատմամբ ԱՄՆ-ի կիրառած պատժամիջոցների մասին` նա ընդգծել է, որ Թուրքիան ցանկանում է զերծ մնալ Իրանի նկատմամբ պատժամիջոցներից, քանի որ Իրանը Թուրքիայի` վառելիքի գլխավոր մատակարարներից մեկն է, և հարևան պետության հետ համագործակցում են մի շարք ոլորտներում: «Թող ոչ ոք չսպասի, որ մենք մեջքով կշրջվենք Իրանին»,- նշել է Թուրքիայի նախագահի խոսնակը: