Կիպրոսը Թուրքիայի դեմ բողոքի նոտա է հղել ՄԱԿ-ին

Եվրամիության անդամ Կիպրոսը Թուրքիայի դեմ բողոք է ներկայացրել ՄԱԿ-ին Կիպրոս կղզու մերձակայքում հորատման աշխատանքներ կատարելու կապակցությամբ. հաղորդում է ermenihaber.am կայքը:

Թուրքիան ածխաջրածնային  հետազոտություններ է իրականացնում Կիպրոսին հարակից տնտեսական գոտում, որը, որպես այդպիսին, Թուրքիայի կողմից չի ճանաչվում:

ԵՄ-ում Կիպրոսի մշտական ներկայացուցիչ Կոռնիլիուս Կոռնիլիուն նամակ է հղել ՄԱԿ-ի գլխավոր քարտուղար Անտոնիո Գուտիերեշին, որում ասվում է, որ Թուրքիան հորատման աշխատանքներ է կատարում այն տարածքներում, որոնք թույլատրվել են միայն ֆրանսիական «Total» և իտալական «Eni» ընկերություններին։ Նշվում է նաև, որ մի շարք տարածքներում նավթի և բնական գազի արդյունահանման իրավունքը նույնպես տրվել է նշված ընկերություններին, այնինչ` Թուրքիան այնտեղ նույնպես իրականացնում է հորատման աշխատանքներ։ Կոռնիլիուն ընդգծել է, որ Թուրքիան խախտել է միջազգային իրավունքի նորմերն ու Կիպրոսի ինքնիշխանության իրավունքը, ինչպես նաև՝ «Ծովային իրավունքի մասին» ՄԱԿ-ի կոնվենցիան: